龍記燒味茶餐廳

地區 : 上環   |   類型 : 燒味
地址 : 香港上環德輔道中300 - 302號地下
電話 : 25222278 / 25222876

兒時懷舊燒味盡在龍記
食嘢唔一定係求味覺嘅享受,有時食嘅更加係一份回憶。近年有唔少老字號結業,相信都傷透咗唔少街坊嘅心,亦令人覺得惋惜!好彩小編係中環區搵到一間老字號飯店,仲保留返昔日嘅懷舊感覺,回憶即刻返晒嚟!希望呢份回憶可以一直保存落去啦。

飯店位於中環域多利皇后街,龍記係好多中環人嘅飯堂,遠見「龍記」招牌甚具威勢,遂長驅直入。店內尚算寬敞,牆上貼滿揮春、菜牌,報紙雜誌訪問等。見牆上一剪報寫此店乳豬、叉燒、燒鵝有「中環三寶」之稱!餐廳設有燒味檔口主打做燒味,當中包括有:龍記金牌燒鵝、玫瑰豉油雞、鴨腳包拼金錢雞及金牌蜜汁叉燒等。其他菜式同樣非常出色,當中包括有薑蔥霸王雞、薑汁臘味炒芥蘭、沙嗲牛肉湯公仔麵及白滷水拼盤等。加上店內燒味師傅已於行內打滾多年,對時間及火候已掌握得純熟精湛,難怪連周中師傅都對龍記燒味讚不絕口。

龍記金牌燒鵝
燒鵝乃店之名物,焉能不點。鵝味果然濃郁,鵝肉係嘴入面油花洴發,連皮連鵝汁一同吃滋味無窮。

玫瑰豉油雞
雞皮色澤棗紅,光滑油潤,皮香肉嫩,食落陣陣玫瑰露香味,真係無得輸!

鴨腳包拼金錢雞
集齊燒肉、叉燒及火腿的鴨腳包極為滋味,金錢雞製作工序繁複耗時,但店主堅持為客人帶來正宗懷舊味道,值得大讚。

金牌蜜汁叉燒
裏面係半肥瘦嘅叉燒,咬落去非常滑,入口溶化,叉燒肉好入味,仲有脆邊,係一個高質素嘅叉燒,果然名不虛傳!

黯然貴妃雞
雞肉厚肉,食落嫩滑,加上浸煮得合時,唔會令到雞肉老身,再加上少少豉油,簡直係出色!

薑汁臘味炒芥蘭
薑汁臘味炒芥蘭,菜嫩,夠哂鑊氣,臘味夠哂入味!薑汁味又夠濃!

沙嗲牛肉湯公仔麵
香濃嘅沙嗲湯底滑嫩嘅牛肉再配多士加炒蛋,係早餐首選!

白滷水鵝掌翼
鵝掌翼好入味,而且唔會好咸,做頭盤係一流!



龍記燒味茶餐廳
地址: 香港上環德輔道中300 - 302號地下
電話: 25222278/25222876
營業時間: 7:00 - 23:00

龍記飯店
地址: 香港中環域多利皇后街12號地下
電話: 25455328/25455386
營業時間: 7:00-22:00