蟹仙海鮮私房.蒸氣石碢

地區 : 尖沙咀   |   類型 : 海鮮
地址 : 尖沙咀天文台圍2號環海大廈2期地舖
電話 : 9017 4949 / 9136 8969

蟹仙 • 鮮味直襲尖沙咀
最近天氣開始凍凍哋,大家對蒸氣鍋嘅意欲係咪開始蠢蠢欲動呢?
今次推薦比大家嘅「蟹仙」,相信對於各位海鮮迷來講,一定唔會陌生!呢到嘅海鮮全部以野生而聞名,皆因老闆做左30幾年海鮮批發商,所以搜羅到唔同種類嘅刁鑽野生海產,唔係度度都食得到㗎!好多海鮮仲會標明原產地,令客人一邊品嚐,一邊增長一吓海產知識,十分貼心。除咗各大電視台及傳媒已經介紹過「蟹仙」分別喺九龍城及新蒲崗的分店外,小編今次介紹比大家嘅,係佢哋最近喺尖沙咀新開張,佔地6,000呎嘅旗艦店。

黎到天文臺圍,離遠已經見到大大隻發光嘅巨蟹作為店舖生招牌,非常吸睛!新店門面闊落,店內以歐陸式裝潢為主,令人心情放鬆,感覺舒適。一行4人坐低,座位寬敞而且空間感十足,十分抵讚。看完餐牌,見到其中一個最新推出嘅四人套餐,計埋個粥底有13款食物咁多,單單係海鮮已經有8款,唔洗諗太多,我們就點黎試吓啦!

店主為慶祝蟹仙入圍2019港飲港食「最人氣美食推介」,而家半價優惠$2,998/4位用 (原價$5,998)就食到喇!

罕有帝皇黃膏肉蟹/越南頂角膏蟹/菲律賓頂級大黄奄
帝皇黃膏肉蟹係青蟹皇帝,膏香肉甜、十分罕有,頂角膏蟹爆膏滿瀉,質感似蛋黃,大黃奄蟹肉質鮮甜嫩滑,各有長處。

冰鎮罕有巨型琵琶龍蝦
市面好少見到嘅琵琶龍蝦,外型其貌不揚,有啲似史前生物,真係唔係每個人都識欣賞。原來肉質優勝過龍蝦,冰鎮過更加鮮甜,肉質一疏疏,蝦頭嘅蝦膏甘香濃郁,果然凍食係有原因嘅。

冰鎮野生左旋大香螺/北韓大海螺
左旋香螺品種罕有,市面上好難見到咁大隻,肉質較有咬口,咀嚼後螺味更加突出,越食越出味。

冰鎮原條加拿大象拔蚌
老闆嚴選加拿大象拔蚌,取其肉質厚而蚌味濃,作為刺身,稍為醮少許芥末醬油,已經令人回味無窮。

野生大瀨尿蝦/冰鎮韓國活赤貝
野生瀨尿蝦巨型得有點嚇人,據知瀨尿蝦離開水後會好容易死亡,所以主廚會先蒸熟再上桌,保留最新鮮嘅瀨尿蝦肉質。韓國入口嘅活赤貝,肉質爽口彈牙,原汁原味,而且營養豐富,非一般本地貨可以相比。

8頭南非鮑魚
因為內臟已經清洗乾淨,蒸熟後肉身離殼,口感結實,鮮甜味十足,唔需要醮額外調味,食原味就最合適喇。

越南大海虎蝦
虎蝦唔洗蒸咁耐,剝殼後顏色帶有光澤,入口肉質脆口,非常新鮮。

蘇格蘭大蟶子/北海道大元貝
蟶子和元貝都是香港人經常吃的海產,店員掌握到蒸鍋嘅火力及時間,所以食落質地仍然好嫩,一啲都唔韌,抵讚!

黑安格斯牛肉/紐西蘭嫩羊片
肉類方面,呢個餐有牛或羊比客人選擇,牛肉唔會太肥,安格斯牛幾時都係最可靠。羊片切得厚薄適中,唔羶得嚟肉質仲好嫩添。

濟州黑毛豬肉
肉質緊嫩,肥瘦均勻,不愧為韓國獨有嘅優質豚肉。

有機蔬菜籃
套餐仲包括埋一份有機蔬菜籃,店長會精選季節得令嘅時蔬比客人㗎!

海鮮粥
呢個粥集合哂所有海鮮嘅精華,配埋排骨同埋南瓜,熬製咗成餐飯嘅時間,有好豐富既海鮮精華同好甜。

原隻木瓜雪燕燉官燕
一頓高質素嘅晚餐,最後又點少得甜品呢?呢一款燉官燕,味道清甜,滋潤養顏,男女都適合。

後記:不得不讚嘅一樣野係,成個用餐過程,店員都會幫我哋控制蒸嘅時間,確保我哋可以品嚐到最鮮最嫩最彈牙嘅海鮮!


蟹仙海鮮私房.蒸氣石碢
地址:尖沙咀天文台圍2號環海大廈2期地舖
電話:90174949/91368969

蟹仙海鮮蒸氣石碢
地址:九龍新蒲崗仁愛街50號地舖
電話:25656118

蟹仙海鮮蒸氣石碢
地址:九龍城龍崗道2-4號地下
電話:23609718