瀛風

地區 : 屯門   |   類型 : 日本菜
地址 : 屯門良景市集110號舖
電話 : 2320 8550

高質素瀛風,吹入屯門民生區
不經不覺開業已經年多嘅瀛風,唔知大家試咗未呢?主打做日式料理外帶,致力選購最新鮮嘅東瀛食材,供應比各街坊食家,哩個穩打穩扎嘅理念及優質嘅出品,令到佢哋短短時間已經開了第2間分店,有咁好成績,小編一於要帶隊出動,親身嘗試一吓哩一股瀛風魔力先得!
上網一查,發現地點交通十分方便,由兆康西鐵站轉乘輕鐵良景站,只需5分鐘就到,啱晒大家新界區附近朋友仔,想買日式外帶,以後又多一個選擇喇。

炙燒三文魚丼
三文魚灸燒得啱啱好,鋪滿晒飯面,魚油滲晒入壽司飯,唧上沙律醬,灑上蔥花,相得益彰。

北海丼
身為「刺身控」嘅我,當然點咗哩一款北海丼啦。由大大隻赤蝦、肥美三文魚、厚切鮮甜帶子及新鮮油甘魚拼砌出嘅北海丼,食材新鮮,難怪每日都大賣啦!

滑蛋鰻魚丼
哩度一系列嘅丼飯賣相十分精美,而哩款「滑蛋鰻魚丼飯」,滑蛋入口帶有濃郁蛋香,食到一半時蛋仍然幼滑,滑蛋上鋪了四大件醬燒鰻魚,鮮味無比,正中間打上一隻生雞蛋,唔洗多講,將蛋汁撈入丼飯拌勻,睇見已經想食!

芝士軟殼蟹卷
軟殼蟹炸得香脆,食落竟然唔覺油膩,油溫控制出色,先比個讚。壽司飯外面鋪上火灸過嘅芝士及蟹籽,小編唔覺唔覺就食晒一份喇。

月見牛肉烏冬
讚岐烏冬質素出名就應該人所共知,配上半生嘅高質牛肉,清清哋,非常有驚喜!

芝士蟹肉 甲羅燒
哩款甲羅燒,外層燒焗得金黃,內裏餡料豐富,鮮甜嘅蟹肉及脆卜卜嘅蟹籽,混入香濃芝士一起烤焗,香氣四溢,令人食指大動!

極上刺身盛
鍾意食刺身丼飯嘅話,另一款「極上刺身盛」可供選擇。材料包括大赤蝦、三文魚、鮮帶子、油甘魚、吞拿魚、希靈魚、赤貝以及肥美既三文魚腩同樣出色!

瀛風卷
外層係火灸到半生熟嘅厚切三文魚,入面加有以秘制醬汁調配既三文魚、以及青瓜絲增加口感、哩種食法又幾特別,大家可以試吓!

海膽手卷
見到手卷系列包羅萬有,小編當然要試最愛嘅海膽手卷啦!海膽好肥美呀!成個口腔爆滿鮮味,食極都仲有海膽,價錢公道,啱晒我哋哩種「海膽控」喇!


地址: 屯門良景市集110號舖
電話: 2320 8550
營業時間: 11:30 - 00:30

地址: 藍田啟田道50號啟田市場地下1087號舖
電話: 2668 0678
營業時間: 11:30 - 01:00