耀記雲吞麵食

地區 : 佐敦   |   類型 : 粉麵
地址 : 佐敦庇利金街31號地下
電話 : 23758329

營業時間: 11:30-23:00 (星期一至星期六)﹑11:30-20:00 (星期日)

周中師傅誠意推介 二十年老字號 耀記雲吞麵食
今期周中師傅又有好推介!喺佐敦庇利金街一帶返工嘅打工仔快啲嚟睇下喇!對於人工唔算高,為咗「上樓」要節衣縮食都係平常事,不過食平嘢唔等於一定係食流嘢,要數到又平又正嘅美食,就當然係可以代表香港嘅雲吞啦!要食到好嘅雲吞,當然要食老字號,不過唔係間間自稱「老字號」嘅都信得過,周中師傅就特別推薦咗呢一間,有超過二十年營運經驗嘅「耀記雲吞麵食」。嚟到當然要試下每隻斬由人手包製嘅「招牌雲吞」,雲吞不單止每隻都份量十足,而且仲有一條完美嘅「金魚尾」,蝦味濃郁又彈牙,當然雲吞嘅靈魂係個湯底,濃腴但唔係鹺鹹,重點係飲完之後唔會覺得口乾,同新蝦雲吞簡直就係絕配,唔怪得就連師傅食完都話正!試得雲吞又點可以唔試埋招牌三寶呢?一次過可以到雲吞﹑牛肉同鯪魚肉呢三味港式粉麵最常見嘅配料,雲吞唔洗再多提,依然有返咁上下水準,牛肉煮到啱啱好,唔會太熟又唔會太生,肉質粉嫩易入口,鯪魚肉鮮味濃而且口感爽彈,簡直係一次過滿足你三個願望!呢啲傳統麵食賣少見少,莫講話要搵有品質保證嘅一間,經營咗十幾二十年嘅老字號更加難搵,最重要係呢啲老字號一定都係價宜物美,絕對適合一班打工仔。