響日本燒肉

地區 : 佐敦   |   類型 : 日本菜
地址 : 佐敦白加士街101號珀軒1樓
電話 : 28865528

營業時間: 18:00-02:00 (設有晚市及宵夜時段)

佐敦放題新食法!先試拼盤後選心水美食
大嘆澳洲和牛 日本空運新鮮魚生

大部份人食放題都會抱住「唔執輸」心態落Order,貪新鮮咩都嗌啲,位都未坐暖已經爭分奪秒Tick好哂食物,所以識食之人周中師傅今期就決定帶大家體驗吓放題新食法!新張開業嘅「響日本燒肉」環境極具空間感,楊老闆透露:「自上年九月便與股東籌備開設日式燒肉放題店,室內設計由其中一位partner親自操刀,傾盡時間和心血構思而成。」牆壁設計以亮眼藝妓手繪為主,配以連串火紅燈籠作點綴,唔洗搭飛機都猶如置身日本,充滿和風濃情!該店對選料方面極為嚴謹,主要供應產自澳洲、美國及日本等地的新鮮食材,師傅會先以優質新鮮魚生拼盤、和牛拼盤招待客人,亦歡迎食客按個人喜好任意點選燒肉、刺身及炸物等,周中師傅食過都話正,唔係唔試啊嘛?

海鮮拼盤
拼盤為四人份量,內含:被視為日本魚中精品的喜之次、蠔、扇貝、鮑魚和蝦,楊老闆甚至分享燒製秘訣,建議客人將貝殼類圍邊、中間燒牛肉,節省時間。

和牛拼盤
牛魔王最愛!精緻拼盤備有:美國牛肋骨、澳洲和牛西冷、澳州和牛胸腹、澳洲和牛肉眼以及爽口有嚼勁的米澤三元豚西冷,客人另可單點鹿兒島及澳洲頂級M9和牛,選擇極多元化。

魚生拼盤
厚薄相若的刺身盡顯師傅極致刀功,該店向供應商取得穩定貨源,所有魚生均從日本空運到港,確保品質最新鮮優質。

炸榴槤
當造榴槤氣味芳香濃郁,以糯米製作外層,一咬下去即湧出大量流心。