鋒味串燒

地區 : 元朗   |   類型 : 串燒
地址 : 元朗南邊圍村舊墟南門口路28號地下
電話 : 6842 4300

營業時間:21:00-04:00

深夜圍村「鋒」味!即叫即燒 選料製作認真
邊個話圍村得盆菜?近年有唔少人嘗試走入圍村探尋高質素美食,山長水遠都在所不辭。南邊圍榕記雞煲一炮而紅,計我話,識食梗係一條龍食埋隔離檔鋒味串燒啦。深宵總是餓,如果有即叫即製嘅惹味串燒配啤酒就Perfect!老闆細鋒手勢純熟,將食物擺上爐度翻幾翻、掃上調味料,三兩吓手板眼見功夫又搞掂一串。雖然鋒味串燒並無華麗裝潢,但夜晚露天開枱食又幾好Feel,更重要嘅係老闆一直堅守原則──「所有事認真辦」,不斷以金睛火眼留意生熟程度同火候時間,樂於聽取客人意見之餘,更會用心研製創新串燒美食,實在值得欣賞。食串燒除咗食材要新鮮之外,醬汁都係靈魂所在,鋒味串燒嘅製法同口味層出不窮,細鋒會用燒烤蜜糖、鹽椒粉、七味粉、花椒粉、甚至啤酒調味,離遠已經聞到香噴噴嘅味道,保證引起食慾、刺激味蕾!識食之人絕對唔會錯過鋒味招牌燒倉魚,魚皮脆口、肉質鮮香惹味,保持應有濕潤感,而今期亦會介紹其他「滄海遺珠」:

蒜蓉粉絲燒扇貝
精選新鮮扇貝製作,幼細香滑嘅粉絲盡情吸收蒜蓉醬汁精華,整體味道充滿層次感。

鋒味香辣燒髀 豬大腸
豬大腸別有一番風味,燒製過程將油脂逼出,滿佈油光的賣相極之誘人。香辣燒髀刺激食慾,肉質唔乾硬,一扯一咬滿嘴油香。

椒鹽香辣燒魷魚翼
魷魚翼鮮味十足,質感爽口並帶有嚼頭,椒鹽香辣風味令人一試愛上!

特色串燒
鋒味串燒備有多元化選擇,多春魚、雞軟骨惹味香口,另有日式照燒八爪魚棒、娃娃菜,各位更可一嚐店內串串黃金香辣蝦,必定食過返尋味。

燒茄子係唔少人至愛,估唔到老闆會喺面層加入勁量香辣蒜蓉肉碎,有圖有真相,絕對無偷工減料。茄子保持應有水份,配合肉碎更加香口惹味。